DISCOURS DE LA COUPO 2017

Santo-Estello de Bagnèro-de-Bigorro

Dilun 6 de jun 2017

DISCOURS DE LA COUPO

PÈR LOU CAPOULIÉ

 

Gènto Rèino,

Moussu lou Maire,

Car Felibre,

 
Aquest an, pèr lou tresen cop, nous sian vengu abéura à-n-aquelo aigo lindo e caudo que raio e gisclo di sorgo bagnereso. La candour e la vertu d’aquélis aigo renègon emé li treboulèri, lis entramble e de cop la sourniero que trop souvènt pourquèjon lis óuvede qu’avènon nosto pauro vido. D’entravadis qu’entrepachon un avenidou à noste biais o lis amiro pantaiado.

 

Coume pas vèire dins aquelo aigo lindo e caudo que raio e gisclo di sorgo bagnereso lou vin pur de noste plant coume l’entènd Mistral ? Lou vin pur de noste plant que dins la Coupo santo e versanto, vuejo à plen bord lis estrambord e l’enavans di fort !

 

Cènt-cinquanto an que Frederi Mistral, en escrivènt uno simplo cansoun de circoustànci, dounè l’inne magnifi qu’entousiasmè lou mounde felibren, l’inne que vuei sèmpre enauro sa pensado e enrego nosto counsciènci de felibre.

 

Lou cant de la Coupo recato touto la sustànci que fargo nosto fe, nosto voio, nosto voulounta e la resoun d’èstre felibre. Mistral suplico la Coupo que nous vèn di Catalan, de nous vueja lis esperanço e li raive dóu jouvènt, la couneissènço dóu Bèu e dóu Verai, la pouësìo pèr canta tout ço que viéu e encaro, prègo sublimo, lis àuti jouïssènço que se trufon dóu toumbèu.

 

De dela la bèuta dóu pouèmo, qunte inne à la patrìo, à la glòri dóu terraire e à l’enavans ! Un inne que de-bon fai signau, empuro l’ardènci e buto à la tenesoun.

 

Entrigassa emé lou simboulisme de la coupo d’argènt, lou Felibrige poussèdo dins si man un tresor d’umanisme, un moudèlo de soucieta, uno sorgo d’ispiracioun bèn-fasènto : jouièu sèns noum, emblemati, esperitau, mai bèn verai, scientamen grandas e soulide chamant au regrèu d’un vièi pople fièr e libre. L’universalita de la Coupo, tant l’óujèt que lou cant, nous counferis uno forço, un poudé, uno lus, d’avantage que devèn metre en relèu, que devèn utilisa à bèl èime.

 

Poussedi la Coupo es uno chanço, un doun, un presènt materiau e sentimentau qu’avèn pas lou dre de banalisa o de degaia, mai qu’au contro avèn pèr emperiouso messioun de coucouneja, de faire fruteja, d’espandi, de clanti e de clama de dela li raro de nòstis encountrado e de noste publi.

 

En pourtant la Coupo à Bagnèro-de-Bigorro, m’atrobe un pau esmougu dins li piado e li pensado de moun davancié Reinié Jouveau que fuguè elegi capoulié eici en 1971 au moumen ounte iéu entamenave ma vido voudado au Felibrige.

 

Reinié Jouveau que disié en 1979 : « En aubourant la Coupo santo de nòstis esperanço, sènte un cop de mai la vertu dóu Felibrige que despièi mai d’un siècle nous esmòu e nous fai viéure subre tóuti li pichoutige dóu mounde à l’aussado de grand pantai uman ».

 

Lou Felibrige, car felibre, aqueste an coume tout de long de soun istòri, a assaja de faire valé lis idèio que soun pas li proumié soucit de nòsti catau. A assaja de faire ausi sa voues, d’apara li valour de la Causo, de faire counèisse e d’espandi sa toco e soun obro.

 

Frederi Mistral, fai cènt-cinquanto an, espausè li foundamento e li glòri de l’istòri, butè au reviéure, sachè nourri tóuti lis esperanço en pourgissènt Calendau i patrioto que sian. Un ensignamen que s’endevèn emé li pensamen e lou coumbat de noste tèms, emé lis aspiracioun, li refleissioun e li decisioun dóu Felibrige de vuei :

 

- Quouro amaduro d’à cha pau la moudernisacioun dóu Tresor dóu Felibrige, lou Counsèu de l’Escri Mistralen enausso la lengo coume Mistral l’enaussè dins Calendau.

 

- Quouro eisalto de proujèt d’aveni, l’Assemblado di jouine respond is estrambord de la jouinesso coume Mistral lis eisaltè dins Calendau.

 

- Quouro aparon li bèn-fa dóu regiounalisme, li felibre countùnion uno determinacioun coume Mistral lou moustrè aferouni dins Calendau.

 

Pièi mai, dóu cant seten de Calendau quand Esterello esbramasso Calendau perqué a aclapa li mèle dóu Ventour, avèn uno vertadiero proufessioun de fe ecoulougico coumparadisso i coumpourtamen dis aparaire de la naturo fàci i chaple envirounamentau que couneissèn.

 

Pièi encaro, gisclo dóu pouèmo la desiranço tant atualo de la parita ome femo.

 

Mistral, un cop de mai, de-bon, emé Calendau es en avanço sus lou tèms.

 

Calendau, car felibre, es lou pouèmo que de-longo a de nous ispira. Engajamen, moudèle, leiçoun, poutènci, patrioutisme e liberta se n’esvarton e nous endraion dins uno perfèto filousoufico vido felibrenco.

 

Engajamen persounau, moudèle de soucieta, leiçoun istourico, poutènci di counvicioun, patrioutisme afierma e liberta patriarcalo : « Calendau es uno dóutrino que gounflo lou cor » dis Leoun Teissier.

 

Aquelo dóutrino que gounflo lou cor, a d’èstre la lèi que nous regis, la lèi que nous enmeno mau-grat l’innouvacioun e l’irraciounau que subroundon li sànis evidènci de l’eisistènci e que de-longo fan bàrri à l’evoulun naturau que poudrian souveta, i valour mouralo essencialo de la vido.

 

Mistral de-longo nous boufo à l’auriho l’envanc e l’endrechiero qu’a durbi. Avèn de l’escouta, de lou segui emé bono fe dins li foundamento de sis ate e de sa pensado.

Mistral a sachu agroupa d’ome e de femo souto uno memo sensibleta, uno memo noucioun, souto uno memo bandiero que soun engèni ié diguè «Felibrige».

 

Lou Felibrige dis óurigino coume lou Felibrige que nous acampo en 2017 noun es uno vago assouciacioun coume n’i’a tant. Lou Felibrige es un biais de viéure e de vèire, lou Felibrige es uno escolo, lou Felibrige es uno filousoufìo, lou Felibrige es uno idèio, lou Felibrige es un ideau. Lourdo respounsableta qu’es la nostro de persegui, de trasmetre la realita, l’amo, lou sentimen, felibren dins ço qu’a de plus vertadié, de plus autenti ; dins ço qu’a de plus proche di moutivacioun primadiero e de l’ardènci dóu jouvènt de 1854. Perdèn jamai de visto qu’es la fogo de la jouinesso que coungreiè la foundacioun dóu Felibrige, que la fogo de la jouinesso es au cor de Calendau coume l’es au cor de Mirèio.

 

Frederi Mistral a cresènço que la jouinesso porto en elo li clau de l’endeveni. En 1904, i’a pas d’asard se dins sa cansoun dóu cinquantenàri, enaurant l’ande dóu Felibrige e lou sant signau, manquè pas, peréu, de clama : « Vous-àutri li gènt jouine  - Que sabès lou secrèt ». Lou secrèt !  Lou secrèt d’engaubia en un memo visioun, en un meme champ d’acioun ço que relèvo dóu passat, dóu presènt e di proujèt d’aveni, valènt-à-dire l’istòri e li glòri d’antan, lis usanço de vuei e lis aspiracioun avenidouiro. Lou secrèt de vèire li resplendour passado se miraia dins l’aveni.

 

Lou secrèt de sesi uno sentimentalita literàri, patrioutico e soucialo, rebat d’un èime flamejant. Lou secrèt religo la fe, lou doun de se e l’afougamen.

 

Lou secrèt pièi es la lengo, lou parla de nòsti maire que noun poudrian óublida.

 

Un secrèt que demoro de naturo dins lou cors de l’ome d’oc, un secrèt que contro-isto emé la matèri e li maucourànti coumprenènço di pauras descouneissènt la prefoundour di simbèu.

 

Un secrèt que s’escound dins li pantai, dins l’enavans, dins l’óutimisme, dins la bèuta e la vertu de la jouinesso, … de la jouinesso eternalo, de la jouinesso di Primadié.

 

Aquelo voio font-segugnenco deliéuro lou message foundamentau de l’avenimen e de la resoun dóu Felibrige. Frederi Mistral proun afisca, voulountous e ferme douno lèu Mirèio,

« Mai lou regounfle d’empressioun que la naturo prouvençalo fasié bouie dins iéu, dis, en pourtissoun dis Isclo d’or, noun s’èro esclafi tout dins aquéli douge cant. Moun païs, soun istòri, si faste, si malur, e sa literaturo, ai-las ! denantourado, me coumbourissien d’amour ; e subre l’estiganço d’atuba dins lou cor de mi coumpatrioto la flamo que sentiéu, entre-prenguère un nouvèu pouèmo. … Ai cresènço que se ‘n jour aquest païs noun es plus desmascla pèr uno educacioun fausso, n’i’a forço qu’auran goust de legi Calendau ». Ié revène, Calendau es lou pouèmo que de-longo a de nous ispira, a de coundiciouna li reflèisse, l’atitudo e li visto de nosto vido de felibre. Pièi mai, s’encourajan l’Assemblado di jouine o la rèino Angelico à chifra sus li mejan à metre en obro pèr pega i realita de vuei, es que li sabèn en fàsi emé la lougico mistralenco, sabèn que tènon lou secrèt pèr que noun s’arrouine lou mounumen escrèt. Empacho pas que dins soun secrèt i’a une part d’ilusioun, la bello ilusioun que narro Mistral en 1880 : « L’illusioun, baume de Diéu, mirau lusènt de la jouinesso, chale e mistèri de l’amour, e brèu de tout bonur sus nosto pauro terro, l’ilusioun, es mai elo que buto li valènt à l’erouïsme, que coungreio e qu’empuro l’artisto e lou pouèto… ».

 

Car Felibre, lou secrèt e l’ilusioun avènon l’esperanço, lou secrèt e l’ilusioun nous fan teni e avança, nous pounchounon e baion un interès, un sèns, uno clarta i toco que nous cridon.

 

Aquelo fe, aquel apèu, aquelo envejo enmenèron sus lou camin de la Respelido d’arderóusi colo qu’antan tenguèron belamen l’empento dins lou relarg pirenen. Demié aquéli plaçan au proumié rèng li valènt jouine Simin Palay e Miquèu Camelat qu’a 17 e 20 an tout escarrabiha publiquèron un Armana de la Bigorro e se diguèron d’agroupa lou mounde pèr agi. « Biarnés que Biarnés, Simin Palay es un mistralen que viro pas l’esquino à Maiano » escriguè Marius Jouveau. Marius Jouveau qu’escriguè peréu :

« À vint an, Filadelfo de Gerdo èro adeja la preiresso de la vièio terro d’o. Adeja souscavo pèr lis escorno que ié fuguèron facho, pèr li liberta que i’èron raubado, pèr soun escarteiramen, e n’en disié la Passioun, dins si vers, en paraulo de fiò ».

 

Avèn vuei en Bigorro, en Gascougno, de nous souveni d’aquéli pouèto d’elèi, d’aquélis óubrié maje, de tóuti aquéli, noumbrous mai que mai, qu’an farga la grando istòri de l’Escolo Gastoun Febus e de l’Escolo deras Pirenèus.

 

D’ome e de femo que se virèron de-vers la lus maianenco e que dóu Biarn, de Bigorro, d’Armagnac, di Lando, dóu Coumenge, dóu Couseran, dóu Vau d’Aran se levèron e encapèron belamen l’obro ditado pèr Mistral.

 

La souvenènço es un devè que nous ajudo à miés draia lis toco avenidouiro. Nous ajudo peréu à afierma l’emplatamen, lou benfa e la necessita dóu Felibrige, nous ajudo à la coustànci de l’esfort e à trepassa lou mesprés. Bono-di la souvenènço, lou passat e l’istòri, avèn proun d’armo pèr afrounta lis escorno que nous aclapon, lis escoumesso que nous amenaçon e pèr enventa li bòni metodo que deman faran nòsti vilo redeveni ciéuta, faran naisse lis art, crèisse li letro, grandi lis ome e flouri uno nacioun. Noblo resounanço i fraso de Pèi de Garròs escricho à la mita dóu siècle segen : « Pèr sousteni l'ounour dóu païs e manteni sa dignita. Mai en liogo de lanço pounchudo, armen-nous de plumo agudo ».

 

Nous fau tóuti li jour miés sesi l’óurigino, lou racinun, la creissènço dóu Felibrige, mai nous fau peréu dins lou meme tèms s’apountela à-n-un prefa requist, aquéu de tout faire pèr que lou Felibrige siegue miés coumprés, miés viscu.

 

Basti à l’entour dóu reviéure de la lengo eiretado di troubadou, lou Felibrige s’es fa ausi e a agi dins tóuti li doumaine relevant de la soucieta, a empura pèr que lou soulèu se fague sus l’Éuropo di regioun.

 

Si preóucupacioun, lou fau dire, fuguèron pas trop espremido aquéli darrié tèms, mai après 164 an de vido e d’acioun, lou Felibrige a sagela sa marco e sa vesioun. « Soun mort li bastissèire, mai lou tèmple es basti. - Au front de la Tour Magno lou sant-signau es fa ».

 

Lou Felibrige a sachu sourti la civilisacioun miejournalo dóu roudan, a fa clanti l’espressioun d’apartenènço, s’es afisca cors e amo a apara li qualita umano e uno meno de liberta, aquelo liberta que fai s’endeveni à la perfecioun l’ome à soun terraire, la memòri is gèst avenidou.

 

À Bagnèro-de-Bigorro, la lucado tancado de-vers elo, voulèn vèire dansa à l’entour de la pouncho dóu Miejour, dins un raiounamen universau, tout lou soulide, la sincerita e lou Verai dóu Felibrige. Voulèn vèire dansa liuen di bàssi counsideracioun pouliticiano, la courouso atualita dóu Felibrige, la requisto esperanço, li raive dóu jouvènt e l’amo de moun païs !

 

Dins lou soulas d’aquelo vesioun celèsto, la coupo emplido de Castèu-Nòu de Mathieu lou primadié, brinde au maire de Bagnèro-de-Bigorro, Moussu Jan-Bernat Sempastous, qu’à la seguido de si predecesssour, en cinquanto-sèt e en setanto-un, a recaliva la flamo felibrenco en terro pirenenco ; brinde à la memòri di fièr pouèto gascoun, à la memòri de l’ilustro pouëtesso Filadelfo de Gerdo ; brinde à la Mantenènço de Gascougno-aut Lengadò.

 

Car Felibre, auboure la Coupo à tout ço que represènto d’ideau e de fraternita.

Beve à la fe e à l’enavans de cadun d’entre vautre.

 

Jaque MOUTTET

Capoulié dóu Felibrige

publié le 26-06-2017

O + O + O



Réagir


CAPTCHA